Türkmen dzýudoçysy Maýsa Pardaýewa 2028-nji ýylda Los-Anjelesde geçiriljek Olimpiýa oýunlaryna saýlama tapgyrynyň ilkinji tapgyry bolan Ulan-Batordaky «Uly tuwulga» ýaryşynda 57 kg çenli agram derejesinde bürünç medal gazandy.
Baýraga barýan ýolda 21 ýaşly türgen Gazagystanyň wekili Dana Abdirowany, Günorta Koreýanyň dzýudoçysy Mimi Huhy we ysraýylly Timna Nelson Lewini ýeňdi. Ýarym finalda Pardaýewa ýaponiýaly Akari Omoriden ýeňildi, ýöne bürünç medal ugrundaky tutluşykda fransuz türgeni Faiza Mokdardan üstün çykdy.
Bu medal Ulan-Batordaky ýaryşda Türkmenistanyň ýygyndy topary üçin ýeke-täk baýrak boldy. Umuman alanyňda, ýaryşda türkmen ýygyndysyna 16 türgen wekilçilik etdi.
Ýaryşyň netijeleri boýunça, medal sanawynda Ýaponiýa birinji orny eýeledi. Onuň hasabynda 8 altyn we 2 kümüş medal bar. Ikinji orunda 2 altyn, bir kümüş we bir bürünç medal bilen Günorta Koreýa ýerleşýär. Üçlügi bir altyn, kümüş we bürünç medal gazanan Italiýanyň milli ýygyndysy jemleýär.
Mongoliýadaky bu ýaryş 2028-nji ýylyň Los-Anjeles Oýunlaryna saýlama oýunlary üçin täze olimpiýa tapgyryny açdy. «IJF World Tour» ýaryşlaryndaky çykyşlar türgenlere dünýä reýtinginde utuk toplamaga mümkinçilik berýär: birinji orun üçin 1 000 utuk, ikinji orun üçin 700 utuk, üçünji orun üçin bolsa 500 utuk berilýär. Her agram derejesinde dünýä reýtinginiň iň güýçli 18 türgeni Olimpiada göni gatnaşmak hukugyny alar. Şol bir wagtda kesgitli çäklendirme bar: her ýurt her agram derejesinde diňe bir wekili ýaryşa gatnaşdyryp biler. Galan orunlar bolsa yklym kwotalary boýunça paýlanar.
Dzýudo boýunça World Tour-yň indiki tapgyry Hytaýyň Sindao şäherinde geçiriler.
