Türkmenistandan sekiz ýaşly tennisçi Alyhan Nurýagdyýew 25-nji we 30-njy maý aralygynda Gazagystanyň Aktobe şäherinde geçirilen «Aktobe Masters 10&Under GA Road to TOP 8» halkara ýaryşynda iki sany altyn medala mynasyp boldy.
Bu ýaryşa 10 ýaşa çenli 96 oglan hem-de 96 gyz gatnaşdy. Alyhan Nurýagdyýew ýekelikde we jübütleýin görnüşde üstünlikli çykyş etdi.
Ýekelikdäki bäsleşikde 60-njy belgi bilen çykyş eden türkmen tennisçisi finala ýetip, Gazagystandan ýaryşyň bäşinji belgili gatnaşyjysy G.Istomini 4:1, 4:2 hasabynda utmagy başardy we ýeňiş gazandy.
Jübütleýin görnüşde bolsa Alyhan Nurýagdyýew Atyrauwdan gelen Nawid Sabyrow bilen bilelikde çykyş etdi. Tennisçiler bäsleşigiň ýeňijileri bolup, ýene-de bir altyn medaly öz hasabyna goşdy.
Aktobedäki ýaryş ýaş türgen üçin şeýle ýokary derejeli ilkinji halkara bäsleşigi boldy. Alyhan Nurýagdyýew Aşgabat şäherine wekilçilik edýär hem-de Ýuriý Rogusskin bilen Meýlis Orazmuhammedowyň ýolbaşçylygynda türgenleşýär. Şeýle hem ol A.S.Puşkin adyndaky türkmen-rus bilelikdäki umumybilim berýän orta mekdebinde bilim alýar we okuwdaky üstünlikleri üçin minnetdarlyk haty bilen hem sylaglandy.
Ozal tennisçi Türkmenistanda sekiz ýaşly türgenleriň arasynda geçirilen bäsleşikleriň hem baýrakly orunlaryny eýeläpdi. Gazagystandaky ýaryşda gazanan ýeňşi bolsa onuň ilkinji uly halkara üstünligidir.
