Aşgabatda ýokanç däl keselleriň öňüni almak, diagnoz goýmak we bejermek meselelerine bagyşlanan halkara ylmy-amaly maslahat geçirildi. Foruma Türkmenistandan, Germaniýadan, Türkiýeden, Azerbaýjandan we Belarusdan öňdebaryjy hünärmenler gatnaşdy diýip, “Neýtralnyý Türkmenistan” gazeti habar berýär.
Maslahatyň esasy temasy ýokanç däl keselleri anyklamagyň we bejermegiň häzirkizaman usullary, ýokanç däl keselleriň öňüni almak we onkologiýa ugrunda halkara hyzmatdaşlyk boldy.
Forumyň çäklerinde öňdebaryjy bejeriş usullary we hirurgiýa usullarynyň ulanylyşy, şeýle-de dürli ýurtlarda barlaghana synaglarynyň ulanylyşy barada hasabatlar hödürlendi.
Türkmen lukmanlary onkologiýa we rakdan öňki keselleri bejermek tejribeleri, şeýle-de geçirilýän öňüni alyş işleriň netijeleri bilen paýlaşdylar.
Mýunhenden (Germaniýa) akuşer-ginekolog Sýuzan Şpesbergiň çykyşy foruma gatnaşyjylarda uly gyzyklanma döretdi, ol howply täze emele gelmeleriň öňüni almak ugrundaky 25 ýyllyk tejribesi bilen paýlaşdy.
“Tegelek” stoluň başynda türkmen we daşary ýurt hünärmenleri keselleri bejermekde we olaryň öňüni almakda dürli usullaryň ulanylyş aýratynlyklaryny ara alyp maslahatlaşdylar, şahsy tejribeleri bilen paýlaşdylar hem-de bu ugurda alymlaryň täze işläp taýýarlamalary barada gürrüň berdiler.
Şeýle-de, forumyň programmasy Onkologiýa ylmy-kliniki merkeziniň hassalary bilen türkmen we daşary ýurt hünärmenleriniň bilelikdäki maslahatlaşmalaryny, barlaghana hünärmenleri üçin okuwlary, şeýle-de Türkiýe Respublikasynyň Jerrahpaş Stambul uniwersitetiniň lukmançylyk fakultetiniň klinika professory Abdullah Serdar Açikgoz bilen bilelikdäki operasiýany öz içine aldy.
