4-nji ýanwarda Birleşen Arap Emirliklerine iş saparynyň birinji gününde Türkmenistanyň Halk Maslahatynyň Başlygy Gurbanguly Berdimuhamedow BAE-niň Prezidentiniň Türkmenistan bilen işleri boýunça wekili Mohamed Said Mohamed Al-Ariki bilen duşuşdy.
BAE-niň Prezidentiniň Türkmenistan bilen işleri boýunça wekili Gurbanguly Berdimuhamedowa wagt tapyp duşuşandygy üçin hoşallyk bildirip, tutuş dünýäde belent abraýa eýe bolan Türkmenistan bilen ysnyşykly, özara bähbitli hyzmatdaşlygy ýola goýmaga uly gyzyklanma bildirýändigini nygtady.
Gurbanguly Berdimuhamedow BAE şu gezekki saparyň barşynda geljegi uly ugurlarynyň ençemesi boýunça özara gatnaşyklaryň mümkinçiliklerini ara alyp maslahatlaşmak üçin oňaýly şertleriň dörediljekdigini ynam bildirdi.
Söwda-ykdysady, bank-maliýe, ýangyç-energetika ulgamlary türkmen-emirlikler gatnaşyklarynyň ileri tutulýan ugurlarynyň hatarynda görkezildi.
Şol bir wagtyň özünde Türkmenistan «ýaşyl» energetikany ösdürmäge uly üns bermek bilen, energiýanyň gaýtadan dikeldilýän çeşmelerini giňden ulanmak boýunça taslamalary ilerletmäge gönükdirilen yzygiderli çäreleri görýär.
Ulag-kommunikasiýa ulgamy hyzmatdaşlygyň beýleki bir geljegi uly ugry hasaplanylýar.
BAE-niň Prezidentiniň Türkmenistan bilen işleri boýunça wekili duşuşmaga döredilen mümkinçilik üçin ýene-de bir gezek hoşallyk bildirip, türkmen halkynyň Milli Liderine şu saparyň çäklerinde geçiriljek, türkmen-emirlikler ykdysady gatnaşyklary pugtalandyrmaga we mundan beýläk-de ösdürmäge ýardam etjek duşuşyklaryň netijeli bolmagyny arzuw etdi.
