4-nji ýanwarda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow iş sapary bilen Birleşen Arap Emirliklerine bardy.
Aşgabadyň Halkara howa menzilinde Gurbanguly Berdimuhamedowy resmi adamlar, şeýle hem BAE-niň Türkmenistandaky Ilçihanasynyň wekili ugratdylar.
Iki ýarym sagatdan soň türkmen halkynyň Milli Lideriniň uçary Birleşen Arap Emirlikleriniň paýtagtynyň iki ýurduň Döwlet baýdaklary bilen bezelen Halkara howa menzilinde gondy.
Howa menzilinde türkmen halkynyň Milli Liderini BAE-niň energetika ministri Suhail Al Mazrui we beýleki resmi adamlar mähirli garşyladylar.
Gysga wagtlyk söhbetdeşligiň barşynda taraplar dünýäniň okgunly ösýän döwletleriniň biri hökmünde Birleşen Arap Emirlikleri bilen özara bähbitli hyzmatdaşlygyň hemmetaraplaýyn giňeldilmegine ýurdumyz tarapyndan aýratyn ähmiýet berilýändigini nygtadylar.
Soňra Gurbanguly Berdimuhamedowyň awtoulag kerweni howa menzilinden iş sapary mahalynda özi üçin niýetlenen kabulhana — «Emirates Palace» myhmanhanasyna ugrady.
