26-njy dekabrda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow «Baýkar Makina Sanaýi we Tijaret A.Ş.» kompaniýasynyň Baş müdiri Lütfü Haluk Baýraktar we «BMC Otomotiw Sanaýi we Tijaret A.Ş.» kompaniýasynyň Dolandyryjylar geňeşiniň başlygy Fuat Tosýaly bilen duşuşdy. Bu barada «Watan» habarlar gepleşiginde habar berildi.
Pikir alyşmalaryň dowamynda goranmak ulgamyndaky özara gatnaşyklary mundan beýläk-de ösdürmegiň mümkinçilikleri ara alnyp maslahatlaşyldy.
Şunuň bilen baglylykda, duşuşygyň dowamynda goranmak senagatynda dünýäde öňdebaryjy orunlary eýeleýän bu türk kompaniýalarynyň tekliplerine garaldy we bu ugurda degişli ylalaşyklar gazanyldy.
Doganlyk ýurduň işewürleri ýolbaşçylyk edýän kompaniýalarynyň öndürýän ýokary hilli we dünýäde uly islegden peýdalanýan önümleriniň täze döwrebap görnüşlerini ilkinji bolup ata Watan Türkmenistana iberilmeginiň hyzmatdaşlyk gatnaşyklarynyň has-da pugtalandyrylmagyna mynasyp goşant boljakdygyny buýsanç bilen bellediler.
Işewürler, öz gezeginde, Türkmenistanyň hemişelik Bitaraplyk hukuk ýagdaýynyň sebitde we dünýäde parahatçylygyň, howpsuzlygyň hem-de durnukly ösüşiň üpjün edilmegindäki möhüm ähmiýetini bellediler.
Duşuşygyň ahyrynda taraplar özara bähbitli hyzmatdaşlygyň mundan beýläk-de pugtalandyryljakdygyna ynam bildirdiler.
