Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna ýurt boýunça howandarlyga mätäç çagalaryň hossarlarynyň ýüz tutmagy bilen jemi 260 sany operasiýa geçirildi. Bu barada Gaznanyň wise-Prezidenti R.Bazarow Gaznanayň müdiriýetiniň mejlisinde habar berdi. Muny «Watan» habarlar gepleşigi ýetirdi.
Şol sanda, 117 sany ýürek-damar kesellerinde, 102 sany ortopediýa kesellerinde we beýleki birnäçe keseller boýunça barlag bejergileri geçirildi. Mundan başga-da, 47 sany çagalarda saglygy goraýyş-öňüni alyş barlaglary geçirildi. 54 sany çagalar saglygy goraýyş maksatly serişdeler bilen üpjün edildi.
Şol sanda näsag çagalaryň daýanç-hereket ediş ulgamynda operasiýalary ýerine ýetirmek bilen bagly serişdeleri sarp edildi. 1 sany «Sawina» kysymly emeli dem beriş enjamy Mary welaýat çagalar hassahanasyna berildi. Ýurdumyzyň welaýatlaryndaky hassahanalaryň Çagalar bölümlerine «Tiz kömek» awtoulaglary berildi. Haýyr-sahawat gaznasynyň serişdeleriniň hasabyna mekdep-internatlary we çagalar öýleri saglygy goraýyş maksatly serişdeler bilen yzygiderli üpjün edilýär.
Gaznanyň hasabyndan 2023-nji ýylyň dowamynda Türkiýe, Ukraina döwletleriniň, Russiýa Federasiýasynyň, Owganystanyň, Palestinanyň çagalaryna ynsanperwerlik kömekleri iberildi.
Türkmen jemgyýetinde ene-atasyndan galan çagalary ogullyga ýa-da gyzlyga almak, olara mynasyp atlary dakmak bilen bagly soraglary çözmek maksady bilen, Gaznanyň ýanynda Ýaşulular Geňeşi döredildi.
R.Bazarow ýurdumyzda hossarsyz çaga ýokdur, her bir çaganyň arkasynda döwlet dur, döwlet Baştutany dur, halkyna hemişe hossar bolan türkmen halkynyň Milli Lideri dur diýip belledi.
