Aşgabatda Türkiýe Respublikasynyň ilkinji prezidenti we esaslandyryjysy Mustafa Kemal Atatürki hatyralamak çäresi geçirildi. Bu barada Anadolu agentligi habar berýär.
Türkiýäniň lideri 1938-nji ýylyň 10-njy noýabrynda aradan çykdy. Şondan bäri her ýyl bu senede 09:05-de (Atatürküň takyk aradan çykan wagty) ýurduň ähli ýerinde bir minut dymyşlyk yglan edilýär.
Aşgabatdaky hatyralamak çäresi Atatürk seýilgähinde geçirildi. Oňa Türkiýäniň Aşgabatdaky ilçisi Togan Oral, Aşgabat şäher häkimliginiň başlygynyň orunbasary Baýrammyrat Gurbanow, Aşgabadyň türkmen-türk mekdebiniň mugallymlary we okuwçylary, ýurtda ýaşaýan Türkiýäniň raýatlary, şeýle-de HBS-iň wekilleri gatnaşdy.
Hatyralamak çäresi bir minut dymyşlyk we iki ýurduň döwlet senalarynyň ýerine ýetirilmegi bilen başlandy.
Çärede Türkiýäniň Aşgabatdaky ilçisi Togan Oral çykyş etmek bilen, Atatürküň öz döwründe ajaýyp liderlik häsiýetlerine eýe bolan we umyt galmady diýlip hasaplanan wagty milleti dikeltmegi başaran zehinli adam bolandygyny belledi. Oral Atatürküň ýurduň ruhdan düşen raýatlaryna umyt berip, olarda “milletiň ykbalyny diňe halkyň kesgitlejekdigine” ynam döredendigini sözüniň üstüne goşdy.
Çärä gatnaşyjylar seýilgähdäki Atatürküň ýadygärligine gül desselerini goýdular.
Ýatlap geçsek, şu ýylyň oktýabr aýynda hormatly Prezidentimiz Serdar Berdimuhamedow Türkiýe Respublikasyna eden saparynyň dowamynda Mustafa Kemal Atatürküň Ankarada ýerleşýän aramgähine gül goýdy.
