Özbegistanyň paýtagty Daşkentde Suw hojalygy boýunça döwletara utgaşdyryjy toparyň 85-nji mejlisi geçirildi. Onda Türkmenistanyň, Täjigistanyň, Gazagystanyň we Özbegistanyň wekilleri Syrderýanyň we Amyderýanyň basseýnindäki suw howdanlaryň işi hakynda Teswirnama gol çekip, suwy ulanmagyň çägini kesgitlediler diýip, Tengrinews habar berýär.
Gazagystanyň suw serişdeleri we üpjünçiligi ministrliginiň mälim etmegine görä, ýurduň Türkestan we Kyzylorda sebitlerini geljek ýylda gerekli suw bilen üpjün etmek hem-de 1,6 milliard kub metr suwy Aral deňzine akdyrmak boýunça ylalaşdylar.
Soňky ýyllarda sebit ýurtlary Aral deňzi boýunça netijeli çözgütleri kabul edip, ekologiýa meselelerine aýratyn üns berýärler.
Suw hojalygy boýunça döwletara utgaşdyryjy toparyň 86-njy mejlisi 2024-nji ýylyň başynda Gazagystanda geçiriler.
