1-nji noýabrda «Merkezi Aziýa — Koreýa Respublikasy» hyzmatdaşlyk forumynyň 16-njy mejlisine gatnaşmagyň çäklerinde Türkmenistanyň Daşary işler ministri Raşid Meredowyň we Aşgabada sapar bilen gelen Gyrgyz Respublikasynyň Daşary işler ministri Žeenbek Kulubaýewiň arasynda gepleşikler geçirildi. Bu barada ýurdumyzyň daşary syýasat edarasynyň saýty habar berýär.
Duşuşygyň dowamynda taraplar türkmen-gyrgyz gatnaşyklaryň ileri tutulýan we geljegi uly ugurlarynyň giň toplumy boýunça pikir alyşdylar.
Ministrler iki döwletiň ýolbaşçylarynyň erki bilen özara hormat goýmaga esaslanýan ikitaraplaýyn gatnaşyklaryň netijeli we yzygiderli ösüşi barada bellediler.
Şeýle hem, Türkmenistan bilen Gyrgyzystanyň halkara we sebit guramalarynyň, ilkinji nobatda, BMG çäklerinde ýola goýulan işjeň hyzmatdaşlygy seljerilip geçildi. Ministrler “Merkezi Aziýa +” gepleşikleriniň çäginde hyzmatdaşlygyň möhümdigini we ähmiýetlidigini nygtadylar.
Diplomatlar söwda-ykdysady ulgamda hyzmatdaşlygyň uly mümkinçilikleriniň bardygyny tassyklamak bilen, ikitaraplaýyn söwda dolanyşygynyň möçberleriniň artýanlygyny bellediler. Şunuň bilen birlikde, elektroenergetikada, gaz pudagynda, ulagda we logistikada, maýa goýum babatynda hyzmatdaşlygyň möhüm meselelerine hem üns çekildi.
Duşuşykda taraplar dürli derejede geçirilmegi meýilleşdirilýän duşuşyklaryň we çäreleriň tertibini ara alyp maslahatlaşdylar.
