«Nahal» hojalyk jemgyýeti Ahal welaýatynyň Bäherden etrabyndaky «Arçman» şypahanasynda goşmaça täze 400 orunlyk bejeriş merkeziniň binalar toplumynyň taslamasyny düzer we ony döwrebap enjamlar bilen üpjün edip, ýanaşyk ýerlerini abadanlaşdyryp gurar. Şeýle hem öň bar bolan «A» we «B» binalarynyň durkuny täzelemek işlerini ýerine ýetirer. Munuň üçin Türkmenistanyň Saglygy goraýyş we derman senagaty ministrligine şertnama baglaşmaga ygtyýar berýän Karara Prezident Serdar Berdimuhamedow gol çekdi.
Resminama laýyklykda, şeýle hem şertnamada binalar toplumy üçin elektrik, aragatnaşyk, gaz, suw üpjünçiliginiň we lagymyň meýdançadan daşarky eltiji inžener ulgamlarynyň hem-de desgalarynyň durkuny täzelemek ýa-da täzelerini gurmak we olary umumyşäher ulgamyna birikdirmek işlerini ýerine ýetirmek göz öňünde tutulandyr.
Gurluşyk işlerine 2023-nji ýylyň noýabr aýynda başlamak we binalar toplumyny 2026-njy ýylyň oktýabr aýynda ulanmaga doly taýýar edip tabşyrmak bellenildi.
