Şu ýylyň 25-26-njy oktýabrynda Samarkant şäherinde Utgaşdyryjy toparyň 42-nji mejlisi we Merkezi Aziýanyň Utgaşdyryjy elektrik energetikasy geňeşiniň 40-njy mejlisi geçiriler. Report agentliginiň özbek HBS-ine salgylanyp belleýşi ýaly, bu barada Özbegistanyň Energetika ministrligi habar berdi.
Energetika forumyna Özbegistanyň, Täjigistanyň, Gazagystanyň, Gyrgyzystanyň we Türkmenistanyň degişli guramalarynyň we gurluşlarynyň wekilleri gatnaşar. Şeýle-de, çärelere synçy hökmünde Russiýadan hem hünärmenler gatnaşar.
Hünärmenler iş tertibinde Merkezi Aziýa sebitiniň 2023-2024-nji ýyllaryň güýz-gyş möwsümine taýýarlyk meselelerini we bu ugurda ýerine ýetirilen işleri seljererler. Şeýle-de, kemçilikler we olary çözmegiň ýollary ara alnyp maslahatlaşylar.
“...Merkezi Aziýanyň halkalaýyn energiýa ulgamynda elektrik üpjünçiliginiň durnuklylygyny üpjün etmek, elektrik energiýasynyň kesilmeginiň öňüni almak, gaýtadan dikeldilýän energiýa çeşmelerini elektrik ulgamlaryna birikdirmek, olaryň dogry ulanylyşy boýunça zerur tejribeleri, şeýle-de sebitiň suw baýlyklaryndan oýlanyşykly peýdalanmagyň perspektiwalaryny ara alyp maslahatlaşmak göz öňünde tutulýar – diýlip, edaranyň habarynda aýdylýar.
