19-njy oktýabrda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Hytaý Halk Respublikasyna iş sapary tamamlap, paýtagtymyz Aşgabada dolanyp geldi.
Öň, iş saparynyň tamamlaýjy gününde Gurbanguly Berdimuhamedowyň HHR-iň Başlygy Si Szinpin bilen gepleşiklerini geçirendigini habar beripdik.
Aşgabadyň Halkara howa menzilinde Gurbanguly Berdimuhamedowy resmi adamlar garşyladylar.
Bu ýerde Hytaý Halk Respublikasynyň Türkmenistandaky ilçihanasynyň wekili türkmen halkynyň Milli Liderini HHR-e saparynyň üstünlikli geçmegi bilen gutlady. Şeýle hem türkmen halkynyň Milli Lideri, Türkmenistanyň Halk Maslahatynyň Başlygynyň Hytaý Halk Respublikasyna iş saparynyň taraplaryň hoşmeýilli erkine, deňhukukly strategik hyzmatdaşlyk ýörelgelerine esaslanýan döwletara gatnaşyklaryň mundan beýläk-de pugtalandyrylmagyna ýardam berjekdigine ynam bildirildi.
