26-njy sentýabrda Prezident Serdar Berdimuhamedow Türkmenistanyň mukaddes Garaşsyzlygynyň 32 ýyllygy mynasybetli dabaralara gatnaşmak üçin ýurdumyza gelen “Kawasaki Heavy Industries Ltd.” ýapon kompaniýasynyň strategiki meseleler boýunça uly geňeşçisi Tatsuýa Watanabeni kabul etdi.
Serdar Berdimuhamedow myhmany mähirli mübärekläp hem-de hoşniýetli arzuwlar üçin minnetdarlyk bildirip, iri ýapon kompaniýasynyň wekiliniň şu saparynyň döwletara gatnaşyklary mundan beýläk-de ösdürmäge täze itergi berjekdigine ynam bildirdi.
Soňky ýyllarda dünýä belli ýapon kompaniýalary bilen özara bähbitli hyzmatdaşlyk aýratyn ösüşe eýe boldy. Bu kompaniýalar ençeme ýyllaryň dowamynda türkmen bazarynda üstünlikli işleýärler.
Tatsuýa Watanabeniň wekilçilik edýän “Kawasaki Heavy Industries Ltd.” kompaniýasynyň “Türkmenhimiýa” we “Türkmengaz” döwlet konsernleri bilen netijeli hyzmatdaşlykda önümçilik desgalarynyň gurluşygyny üstünlikli amala aşyrandygy munuň aýdyň mysalydyr.
Duşuşygyň çäklerinde ýurdumyzda amala aşyrylýan, milli ykdysadyýeti döwrebaplaşdyrmaga we okgunly ösdürmäge gönükdirilen giň gerimli maksatnamalary nazara almak bilen, özara gatnaşyklaryň geljegi barada gyzyklanma bildirilip, pikir alşyldy.
Türkmenistanyň himiýa we nebitgaz pudagyny ösdürmekde täze taslamalary durmuşa geçirmek, hususan-da, ýurdumyzda fosfor, ammiak, karbamid we tebigy gazdan benzin öndürýän desgalaryň önümçiligini artdyrmak boýunça tekliplere seretmäge taýýardyrys diýip, döwlet Baştutanymyz nygtady.
Öz nobatynda, işewür wekilçilik edýän kompaniýasynyň ýurdumyz bilen uzakmöhletli özara bähbitli hyzmatdaşlyga çalyşýandygyny nygtap, Ýaponiýanyň işewür toparlarynyň geljegi uly türkmen bazaryna uly gyzyklanma bildirýändigini we türkmen hyzmatdaşlaryna öz tejribesini hem-de iň täze tehnologik işläp taýýarlamalaryny hödürlemäge taýýardygyny belledi. Türkmen bazarynda işewürligi ilerletmek üçin has oňaýly şertler döredildi.
