26-njy sentýabr Türkmenistanyň Halk Maslahatynyň Başlygy Gurbanguly Berdimuhamedow “Bouygues” kompaniýalar toparynyň baş direktory Marten Buig bilen duşuşdy.
Duşuşygyň dowamynda taraplar ýerine ýetirilýän işleriň häzirki ýagdaýy we ony ösdürmegiň geljekki ugurlary bilen baglanyşykly meseleleri ara alyp maslahatlaşdylar.
Meşhur fransuz kompaniýasynyň ýolbaşçysy wekilçilik edýän holdingi üçin Türkmenistan bilen hyzmatdaşlyk etmegiň hem-de Aşgabadyň binagärlik keşbini özgertmäge gönükdirilen giň gerimli taslamalary durmuşa geçirmäge gatnaşmagyň uly hormatdygyny nygtady.
Gurbanguly Berdimuhamedow türkmen paýtagtynyň keşbini özgertmek boýunça giň gerimli gurluşyk taslamalaryny durmuşa geçirmekde «Bouygues» kompaniýasynyň baý tejribesini aýratyn nygtady.
Ýurdumyzda amala aşyrylýan taslamalarda biz ylmy taýdan esaslandyrylan çemeleşmeleriň, innowasion tehnologiýalaryň ulanylmagyny, ekologiýa howpsuzlygynyň kadalarynyň berjaý edilmegini, gurluşykda türkmen äheňleriniň nazara alynmagyny hemişe goldaýarys diýip, Gurbanguly Berdimuhamedow sözüni dowam etdi we “Bouygues” kompaniýasynyň öz üstüne alan borçnamalaryny bellenen wagtynda we jogapkärli ýerine ýetirmeginiň hem-de gurluşygyň ýokary hilini üpjün etmeginiň zerurdygyny belledi.
Duşuşygyň dowamynda geljekki işler barada pikir alşyldy, Türkmenistanyň durmuş-ykdysady taýdan ösüşiniň ileri tutulýan ugurlaryny nazara almak bilen, fransuz kompaniýasynyň täze bilelikdäki taslamalara gatnaşmagynyň mümkinçiliklerine garaldy.
Öz nobatynda, işewür “Bouygues” kompaniýasynyň öz üstüne alan hyzmatdaşlyk borçnamalaryna mundan beýläk-de berk hem-de örän jogapkärli eýerjekdigine ynandyrdy.
