26-njy sentýabrda Türkmenistanyň Halk Maslahatynyň Başlygy Gurbanguly Berdimuhamedow GFR-iň «CLAAS» kompaniýasynyň paýdarlar jemgyýetiniň başlygy, german ykdysadyýetiniň Gündogar komitetiniň başlygy Katrina Klaas-Mýulhoýzer bilen geçiren duşuşygynyň barşynda özara bähbitli hyzmatdaşlygy mundan beýläk-de ösdürmegiň geljegini ara alyp maslahatlaşdy. Bu barada «Watan» habarlar gepleşiginde habar berildi.
Duşuşygyň dowamynda türkmen-german gatnaşyklarynyň meseleleri boýunça gyzyklanma bildirilip, pikir alşyldy. Söwda-ykdysady ulgam şol gatnaşyklaryň möhüm ugurlarynyň biridir. Şunda Türkmenistanda ykdysadyýeti senagatlaşdyrmak we diwersifikasiýalaşdyrmak boýunça amala aşyrylýan giň gerimli maksatnamalary nazara almak bilen dürli pudaklarda netijeli hyzmatdaşlygy giňeltmek üçin amatly mümkinçilikleriň döreýändigi bellenildi. Munuň üçin ägirt uly kuwwat, şol sanda senagat, energetika, ulag we kommunikasiýalar, obasenagat toplumy ýaly ulgamlarda we beýleki ugurlarda giň mümkinçilikler bar.
Şunuň bilen baglylykda, Türkmenistanyň we german ykdysadyýetiniň Gündogar komitetiniň arasynda ikitaraplaýyn işewür gatnaşyklary ýola goýmakda hyzmatdaşlygyň netijeli häsiýeti bellenildi. Şunda iki ýurduň özara bähbitli hyzmatdaşlygy, şol sanda maýa goýum ulgamyndaky gatnaşyklary mundan beýläk-de ösdürmäge meýillidigi tassyklanyldy.
Gurbanguly Berdimuhamedowyň belleýşi ýaly, ýurdumyz toplanan oňyn tejribä esaslanyp, germaniýaly hyzmatdaşlarymyzyň netijeli gatnaşyklary dowam etdirmek boýunça anyk tekliplere garamaga taýýardyr.
