10-njy iýunda Türkmenistanyň daşary işler ministriniň orunbasary Mähri Bäşimowanyň gatnaşmagynda daşary ýurtlaryň diplomatik wekilhanalarynyň ýolbaşçylary bilen ikitaraplaýyn duşuşyklar geçirildi. Gepleşikleriň barşynda syýasy-diplomatik gatnaşyklary we halkara guramalaryň çäklerindäki hyzmatdaşlygy ösdürmek meseleleri ara alnyp maslahatlaşyldy. Bu barada DIM-iň metbugat gullugy habar berýär.
Finlýandiýa Respublikasynyň Türkmenistandaky (oturýan ýeri Helsinki ş.) täze bellenen ilçisi Maria Agre bilen duşuşykda ilçi öz ynanç hatlarynyň nusgalaryny gowşurdy. Türkmen tarapy diplomaty jogapkärli wezipä bellenmegi bilen gutlap, geljekki işlerinde üstünlikleri arzuw etdi.
Söhbetdeşligiň dowamynda taraplar iki ýurduň daşary syýasat edaralarynyň we parlamentleriniň arasyndaky gatnaşyklary işjeňleşdirmegiň ähmiýetini nygtady. Şeýle hem söwda-ykdysady we medeni-ynsanperwer ulgamlardaky hyzmatdaşlygy, şol sanda Ýewropa Bileleşigi we beýleki halkara guramalaryň çäklerindäki özara hereketleri giňeltmegiň geljekki mümkinçiliklerine seredildi.
Ilçi Maria Agre netijeli gatnaşyklary ösdürmek ugrunda ähli tagallalaryny etmäge taýýardygyny beýan etdi.
Günüň dowamynda Ýaponiýanyň Türkmenistandaky Adatdan daşary we Doly ygtyýarly ilçisi Sasaki Hiroşi bilen hem duşuşyk geçirildi. Diplomatlar türkmen-ýapon hyzmatdaşlygynyň häzirki meselelerini we geljegini ara alyp maslahatlaşdy.
Gepleşiklerde halkara düzümleriň çäklerinde alnyp barylýan hyzmatdaşlyga aýratyn üns berildi. Taraplar ählumumy parahatçylygy we durnukly ösüşi pugtalandyrmak maksady bilen halkara giňişlikde hereketleri utgaşdyrmagy dowam etdirmegiň möhümdigini belledi.
Duşuşygyň ahyrynda Türkmenistan bilen Ýaponiýanyň arasyndaky konstruktiw dialogy ikitaraplaýyn we köptaraplaýyn esasda mundan beýläk-de çuňlaşdyrmaga ygrarlylyk tassyklanyldy.
