8-nji iýunda Türkmenistanyň daşary işler ministri Raşid Meredow iş sapary bilen Aşgabada gelen ABŞ-nyň Döwlet sekretarynyň jemgyýetçilik diplomatiýasy boýunça orunbasary Sara Rojers bilen duşuşdy. Bu barada daşary syýasat edarasynyň metbugat gullugy habar berýär.
Duşuşykda taraplar Türkmenistanyň we ABŞ-nyň syýasy-diplomatik, söwda-ykdysady hem-de medeni-ynsanperwer ugurlardaky netijeli gatnaşyklaryny maslahatlaşyp, ýokary derejeli aragatnaşyklaryň ikitaraplaýyn hyzmatdaşlygy ösdürmekde esasy görkeziji bolup durýandygyny nygtady.
Diplomatlar bilim, ylym, medeniýet we ykdysadyýetiň esasy pudaklarynyň sanlylaşdyrylmagy ugurlaryndaky gatnaşyklara aýratyn üns berdi. Häzirki wagtda Türkmenistanyň ABŞ-nyň 15-den gowrak bilim maksatnamasyna gatnaşýandygy we iki ýurduň ýokary okuw mekdepleriniň arasynda hyzmatdaşlygyň ýola goýlandygy bellenildi.
Şeýle hem Türkmenistanda 25 ýyl bäri üstünlikli amala aşyrylýan “Medeni mirasy gorap saklamak boýunça Ilçiler gaznasy” Halkara maksatnamasynyň ähmiýeti aýratyn bellenip, medeni-ynsanperwer ulgamda täze bilelikdäki taslamalary guramak mümkinçilikleri gözden geçirildi.
Duşuşygyň dowamynda köpçülikleýin habar beriş serişdeleri, jemgyýetçilik bilen aragatnaşyklar we köpçülikleýin diplomatiýa ugurlarynda hünär gatnaşyklaryny ösdürmek hem-de tejribe alyşmak meseleleri ara alnyp maslahatlaşyldy.
Taraplar özara bähbitli hyzmatdaşlygy ikitaraplaýyn formatda, şeýle hem “C5+1” görnüşinde mundan beýläk hem işjeň ösdürmäge taýýardyklaryny tassyklady.
