Prezident Serdar Berdimuhamedow uly mümkinçilikleriň bardygyny belläp, nemes hyzmatdaşlaryny has işjeň gatnaşyk etmäge çagyrdy. Bu barada döwlet Baştutany 26-njy sentýabrda GFR-iň «CLAAS» kompaniýasynyň paýdarlar jemgyýetiniň başlygy, german ykdysadyýetiniň Gündogar komitetiniň başlygy hanym Katrina Klaas-Mýulhoýzer bilen duşuşygynda belledi. Bu barada «Watan» habarlar gepleşiginde habar berildi.
Duşuşygyň dowamynda bellenilişi ýaly, Türkmenistan bilen Germaniýa dürli pudaklarda, şol sanda saglygy goraýyş, oba hojalygy we maliýe-bank ulgamlarynda netijeli gatnaşyk edýärler. German ykdysadyýetiniň Gündogar komiteti bilen söwda-ykdysady, işewür gatnaşyklary ösdürmek, maýa goýum işjeňligini höweslendirmek boýunça hyzmatdaşlyk üstünlikli amala aşyrylýar.
Nygtalyşy ýaly, Türkmenistan ykdysadyýeti senagatlaşdyrmak we diwersifikasiýa ýoly bilen ösdürmek boýunça giň gerimli maksatnamalary durmuşa geçirip, ýokary tehnologiýalary, döwrebap bilimleri we öňdebaryjy dolandyryş çözgütlerini tejribä ornaşdyrmak ulgamynda halkara hyzmatdaşlygyna uly üns berýär. Serdar Berdimuhamedow bular barada aýtmak bilen, nemes hyzmatdaşlarymyzy has işjeň gatnaşyk etmäge çagyrdy. Munuň üçin bolsa uly mümkinçilikler bar.
