Türkmenistanyň Saglygy goraýyş we derman senagaty ministrligine 45 sany näsagyň monitory we 100 sany pulsoksimetr gowşuryldy. Täze lukmançylyk enjamlary TSGweDSM-niň garamagyna BMG-niň Ösüş Maksatnamasynyň «Türkmenistanda COVID-19-a garşy göreşmek» taslamanyň çäklerinde gelip gowuşdy. Bütindünýä banky taslamany maliýeleşdirmek üçin ABŞ-nyň 80,852 dollaryny bölüp berdi diýip, ORIENT agentligi BMGÖM-niň Türkmenistandaky edarasyna salgylanyp habar berýär.
Bu enjamlar inçe bejeriş bölümlerinde we reanimasiýalarda ulanylyp, näsagyň pulsuny, ýürek urgusyny, arterial basyşyny, temperaturasyny we ganyň kislorod bilen doýgunlygyny yzarlamaga mümkinçilik berýär. EKG-niň netijeleri bolsa enjamyň özünde neşir edilip, kardiologa gowşurylyp bilner.
Täze gelen enjamlar Aşgabat şäheriniň we welaýatlaryň saglygy goraýyş edaralaryna paýlanyp berler.
