Ertir, 15-nji martda Aşgabatda Halkara onkologiýa ylmy-kliniki merkeziniň, Halkara pediatriýa merkeziniň, şeýle hem Stomatologiýa merkeziniň gurluşyklarynyň düýbüni tutmak dabarasy geçiriler. Ýurdumyz üçin ähmiýetli täze desgalary Türkiýäniň «Gap Inşaat» kompaniýalar topary gurar. Bu barada şu gün, 14-nji martda türkmen halkynyň Milli Lideri Gurbanguly Berdimuhamedowyň «Çalyk Holding» kompaniýalar toparynyň dolandyryjylar geňeşiniň başlygy Ahmet Çalyk bilen geçiren duşuşygynda bellenildi.
Gurbanguly Berdimuhamedow ilki bilen doganlyk ýurtda bolup geçen tebigy betbagtçylyk zerarly gurban bolanlaryň dogan-garyndaşlaryna hem-de ýakynlaryna ýürekden gynanç we medet beriji sözlerini, ejir çekenlere bolsa, tiz wagtda sagalmaklary baradaky dileglerini beýan etdi. Şu agyr pursatda olara duýgudaşlyk bildirmegiň türkmen halkyna mahsus häsiýetleriň biridigini belläp, türkmen halkynyň Milli Lideri medet beriji sözleriň ynsan ruhuny götermekde ähmiýetlidigini durmuş tejribesiniň subut edendigini aýtdy.
Duşuşygyň barşynda işewür özüniň ýolbaşçylyk edýän düzüminiň Türkmenistanda alyp barýan işleriniň netijeleri, öňde goýlan wezipeleri üstünlikli ýerine ýetirmegiň kesgitlenen ugurlary barada hasabat berdi.
