4-nji martda Türkmenistanyň Prezidentiniň tabşyrmagy boýunça Halk Maslahatynyň Başlygy Gurbanguly Berdimuhamedow Aşgabadyň günorta böleginde gurluşygy tamamlaýjy tapgyra gadam basan Magtymguly Pyragynyň medeni-seýilgäh toplumynyň çäklerinde alnyp barylýan işleriň barşy, birnäçe şekil taslamalary bilen tanyşdy. Şeýle hem bu ýerde Russiýanyň «Wozroždeniýe» taslama-gurluşyk kompaniýalar toparynyň ýolbaşçysy Igor Bukato bilen duşuşdy.
«Wozroždeniýe» taslama-gurluşyk kompaniýalar topary bu ýerde rejelemek, dizaýn-bezeg işlerini ýerine ýetirýär.
Soňra Türkmen halkynyň Milli Lideri şekil taslamalarynyň ýanyna geldi. Bu ýerde «Wozroždeniýe» taslama-gurluşyk kompaniýalar toparynyň ýolbaşçysy I.Bukato alnyp barylýan işler barada hasabat berdi.
Ýerine ýetirilýän işler bilen baglylykda, hormatly Arkadagymyz bu ýerdäki basgançaklaryň hem-de onuň degişli serişdeleriniň oňaýly we amatly bolmalydygyna ünsi çekdi hem-de häzirki zamanyň öňdebaryjy tejribesiniň we täzeçil usullarynyň işjeň ulanylmagyna, diňe ýokary hilli, ýerli tebigy we howa şertleriniň täsirine durnukly, berk serişdeleriň ulanylmagyna mundan beýläk-de ýokary derejede üns berilmelidigini nygtady.
Şonuň bilen birlikde-de, hormatly Arkadagymyz medeni-seýilgäh toplumda täzeçil tehnologiýalary ulanmagyň möhümdigini aýdyp, häzirki zaman yşyklandyryş enjamlaryny ulanmak arkaly Pyragynyň tutuş ösen adamzat jemgyýetine belli bolan şygyrlarynyň ganatly setirlerini baýyrlaryň ýüzünde lazer şöhlelendirmeleri arkaly ýagtylandyrmagyň zerurdygyna ünsi çekdi hem-de bu wezipeleri üstünlikli çözmäge jogapkärli we toplumlaýyn çemeleşmegi degişli ýolbaşçylara tabşyrdy. Gurbanguly Berdimuhamedow desganyň açylyş dabarasynda şu aýratynlyklary hem hökman peýdalanmagyň maksadalaýyk boljakdygyny nygtap, açylyş dabarasyna ýokary derejede taýýarlyk görülmelidigini aýratyn nygtady.
«Wozroždeniýe» taslama-gurluşyk kompaniýalar toparynyň ýolbaşçysy sözüni dowam edip, «Türkmenbaşy — Garabogaz — Gazagystanyň serhedi» awtomobil ýolunyň gurluşygy boýunça hasabat berdi.
Mundan başga-da, Gurbanguly Berdimuhamedow suw meselesi barada durup geçdi. Bu babatda häzirki döwrüň ýagdaýlary bilen baglylykda, suw serişdelerini gorap saklamagyň we olary rejeli peýdalanmagyň täzeçil tehnologiýalary we ylmyň soňky gazananlaryny ulanmak arkaly ýurdumyzyň ähli derýalarynda endigan suw akymyny üpjün etmegiň möhümdigi bellenildi.
Şeýle hem Gurbanguly Berdimuhamedow Ministrler Kabinetiniň Başlygynyň orunbasary B.Annamämmedowa hem-de Aşgabat şäheriniň häkimi R.Gandymowa ýüzlenip, paýtagtymyzda şähergurluşyk maksatnamasynyň ýerine ýetirilişiniň depginleriniň pesdigini belledi.
Gahryman Arkadagymyz şäherde durmuş maksatly desgalaryň, aýratyn-da, Senagatçylar we telekeçiler birleşmesiniň agzalaryna ynanylan gurluşyklaryň haýal alnyp barylýandygyna ünsi çekip, bu ugurda ýerine ýetirilýän işlerde ýol berlen kemçiliklere kanun esasynda jogap bermeli boljakdygyny ýatlatdy. Türkmen halkynyň Milli Lideri wise-premýere bu ugurda alnyp barylýan işlere gözegçiligi güýçlendirmegi tabşyrdy.
