Hytaý Dalian Jinzhouwan howa menziliniň gurluşygyny dowam etdirýär, ol gurlup gutarylandan soň, emeli adada ýerleşýän dünýäde iň uly howa menzili bolar. Bu toplum Dalýan şäheriniň kenarýakasyndaky Bohaý deňzinde gurulýar. Onuň 2035-nji ýyla çenli doly işe girizilmegine garaşylýar.
Taslama üçin takmynan 20 inedördül kilometr meýdany tutýan emeli ada döredilýär. Gurluşygyň çykdajylary 4,3 milliard dollara barabar diýlip çaklanylýar. Toplumyň binýady 80 metrden gowrak çuňlukda ýerleşýän 3000-den gowrak daýanç sütünlerden ybarat. Adany emele getirmek üçin eýýäm takmynan 187 million kub metr toprak getirildi.
Gurluşyk işleri Lýaonin welaýatynyň Dalýan şäheriniň kenaryndan takmynan 4,5 kilometr uzaklykda alnyp barylýar. Gurluşyk tamamlanandan soň, Dalian Jinzhouwan emeli adalarda gurlan Gonkongyň we Ýaponiýanyň Kansaý howa menzillerinden hem uly bolar.
Täze awiasiýa merkezine bolan zerurlyk, bar bolan Çžouşuizi howa menziliniň çäkli şertlerinden gelip çykýar. Takmynan bir asyr mundan ozal gurlan we onlarça ýylyň dowamynda birnäçe gezek giňeldilen bu howa menziliniň töwereginde daglaryň we gür şäher gurluşygynyň bolmagy sebäpli ony mundan beýläk ösdürmek mümkin däl. Häzirki wagtda howa menzilinde diňe bir uçuş-gonuş zolagy bar.
Taslamanyň baş inženeri Li Sýan köne howa menziliniň dag jülgesinde ýerleşmeginiň ýaramaz howa şertlerinde uçaryň uçuşyny kynlaşdyrýandygyny hem-de uçuş we gonuş wagtynda töwekgelçilikleri artdyrýandygyny belledi.
Täze howa menzili Dalýanyň Ýaponiýa we Günorta Koreýa bilen baglanyşdyryjy söwda we ulag merkezi hökmünde dowamly ösüşini goldamaklyga niýetlenendir. Gutarnykly konfigurasiýasynda toplumda dört uçuş-gonuş zolagy we 900 000 inedördül metrlik terminal bolar.
Taslama boýunça ýylda 80 million ýolagçy we takmynan bir million tonna ýük daşamak mümkinçiligi göz öňünde tutulýar. Şeýle hem, howa menzili ýylda takmynan 540 müň awiauçuşy kabul edip biler. Taslamanyň birinji tapgyry, hatda ýylda takmynan 20 million ýolagçyny kabul edýän Dalýan howa menziliniň häzirki kuwwatyndan hem ep-esli artyk bolar.
