17-nji iýunda Aşgabatda Ykdysady hyzmatdaşlyk boýunça türkmen-slowak bilelikdäki toparynyň birinji mejlisi öz işine başlady. Türkmenistanyň Daşary işler ministrliginiň habar bermegine görä, bu çärä gatnaşmak üçin Slowakiýa Respublikasynyň ykdysadyýet ministriniň orunbasary Wladimir Şimonýagyň ýolbaşçylygyndaky wekiliýet Türkmenistana geldi.
Toparyň ýolbaşçylarynyň duşuşygy «Ýyldyz» myhmanhanasynda geçirildi. Taraplar bu gepleşikleriň ikitaraplaýyn ykdysady gatnaşyklary mundan beýläk-de ösdürmek we iki ýurduň arasyndaky hyzmatdaşlygy giňeltmek ugrundaky ähmiýetini nygtady.
Mejlisiň dowamynda gatnaşyjylar söwda-ykdysady gatnaşyklaryň häzirki ýagdaýyny, ykdysadyýetiň dürli pudaklarynda özara gatnaşyklaryň geljegini we bilelikdäki taslamalary durmuşa geçirmegiň mümkinçiliklerini ara alyp maslahatlaşdy. Ýangyç-energetika toplumynda, gurluşykda, ulag, aragatnaşyk we maglumat tehnologiýalarynda, oba hojalygynda, daşky gurşawy goramakda, saglygy goraýyşda, bilimde, medeniýetde, sportda we syýahatçylykda hyzmatdaşlygy ösdürmek meselelerine aýratyn üns berildi.
Saparyň çäklerinde myhmanlar Aşgabat şäheriniň gözel ýerleri bilen tanyşdy. Olar «Halk hakydasy» ýadygärlikler toplumyna, Türkmen halysynyň milli muzeýine we Türkmenistanyň Döwlet medeniýet merkeziniň Döwlet muzeýine baryp gördi.
18-nji iýunda mejlis öz işini dowam etdirdi. Onuň jemleri boýunça degişli Teswirnama gol çekilmegine garaşylýar.
