Şu gün, 2-nji martda Azerbaýjana iş saparynyň çäklerinde Prezident Serdar Berdimuhamedow Bakuda öz işine başlan Goşulyşmazlyk Hereketiniň COVID-19 bilen göreşmek boýunça Aragatnaşyk toparynyň Sammitine gatnaşýar.
Trend agentliginiň habar bermegine görä, sammitiň işine 70-den gowrak ýurduň wekilleri, şol sanda Bosniýa we Gersogowinanyň, Özbegistanyň, Yragyň, Liwiýanyň prezidentleri, Kubanyň, Gabonyň, Tanzaniýanyň wise-prezidentleri, Alžiriň we Keniýanyň premýer-ministrleri, dürli ýurtlaryň ýokary derejeli wekilleri, şeýle hem halkara guramalarynyň ýolbaşçylary — BMG-niň Baş Assambleýasynyň 77-nji mejlisiniň prezidenti Çabo Kýorýoşi, BMG-niň Bütindünýa syýahatçylyk guramasynyň Baş sekretary Zurab Pololikaşwili, Migrasiýa boýunça Halkara guramasynyň Baş direktory Antonio Witorino, BMG-niň Ženewadaky bölüminiň Baş direktory Tatýana Walowaýa, Ykdysady hyzmatdaşlyk guramasynyň baş sekretary Hysrow Noziri we beýlekiler, şeýle hem ministrler, ministrleri orunbasarlary, ilçiler we beýlekiler gatnaşýar.
Sammitiň dowamynda, COVID-19 pandemiýasynyň netijelerini ýeňip geçmek nukdaýnazaryndan hyzmatdaşlygy ösdürmek we giňeltmek ýaly möhüm meseleleri ara alyp maslahatlaşylýar.
