18-nji fewralda Türkmenistanyň Prezidentiniň tabşyrygy boýunça, Halk Maslahatynyň Başlygy Gurbanguly Berdimuhamedow Ahal welaýatynyň Arkadag şäherine iş saparyny amala aşyryp, şäheri ösdürmegiň ikinji tapgyrynda gurulmagy meýilleşdirilýän binalaryň we desgalaryň şekil taslamalary hem-de gurluşyk üçin niýetlenen ýer bölekleriniň çyzgylary bilen tanyşdy. Bu barada «Watan» habarlar gepleşiginde habar berildi.
Arkadag şäheriniň gurluşygynyň ikinji tapgyrynyň binalarynyň şekil taslamalary bilen tanyşlyk çäresine ýurdumyzyň käbir wise-premýerleri, birnäçe ministrlikleriň we pudaklaýyn dolandyryş edaralarynyň, Senagatçylar we telekeçiler birleşmesiniň ýolbaşçylary, Ahal welaýatynyň merkeziniň gurluşygy boýunça döwlet komitetiniň başlygy, şeýle hem Arkadag şäheriniň häkimi gatnaşdylar.
Görkezilen şekil taslamalaryň hatarynda, şäheriň dolandyryş we jemgyýetçilik binalarynyň, awtomenzil we awtotoplum desgalarynyň, teklip edilýän demir ýol menziliniň hem-de bu düzümlere degişli ugurdaş desgalaryň şekil taslamalary, olaryň ýerleşdiriljek ýerleriniň çyzgylary, durky täzelenilýän awtomobil ýollarynyň bölekleri, täze ýollaryň çyzgylary hem-de dürli gatly, ähli amatlyklary özünde jemleýän ýaşaýyş jaýlarynyň taslamalarynyň, olaryň ýerleşjek ýerleriniň çyzgylary bar.
Saparynyň barşynda Gurbanguly Berdimuhamedow bu ýerde degişli ýolbaşçylaryň gatnaşmagynda iş maslahatyny geçirdi.
Soňra Türkmen halkynyň Milli Lideri şäheriň gurluşygynyň birinji nobatdakysynyň açylyş dabarasy geçiriljek Baş baýdak meýdançasyna baryp gördi.
