Türkmenistanyň Prezidenti Serdar Berdimuhamedow «Halkara Pediatriýa merkezini gurmak hakyndaky», «Halkara Onkologiýa ylmy-kliniki merkezini gurmak hakyndaky» hem-de «Stomatologiýa merkezini gurmak hakyndaky» kararlara gol çekdi. Degişli resminamalara döwlet Baştutany 10-njy fewralda giňişleýin Hökümet mejlisiniň barşynda gol çekdi.
Resminama laýyklykda, Aşgabat şäherinde 160 orunlyk Halkara pediatriýa merkeziniň, Stomatologiýa merkeziniň, 500 orunlyk Halkara onkologiýa ylmy-kliniki merkeziniň gurluşygyna başlamak meýilleşdirilýär.
Mejlisiň barşynda döwlet Baştutany şeýle hem «Saglyk» döwlet maksatnamasyny üstünlikli durmuşa geçirmek, keselleriň öňüni alyş we bejeriş çärelerini talabalaýyk ýola goýmak, ýokary hilli saglygy goraýyş hyzmatlarynyň elýeterliligini üpjün etmek, şeýle hem derman senagatyny ösdürmek boýunça işleri dowam etmegi tabşyrdy.
