Birnäçe ylmy guramalaryň alymlary dünýäde ilkinji gezek ganyň - eritrositleriň emeli ýetişdirilen öýjüklerini goýbermek boýunça kliniki barlagy geçirýärler diýip, Kembrij uniwersitetiniň habarynda aýdylýar.
"Öýjükler donorlaryň ýogyn düýpli öýjüklerinden ösdürilip ýetişdirildi. Soň eritrositler randomizirlenen gözegçilik edilýän RESTORE kliniki barlagynyň dowamynda meýletinçilere goýberildi" - diýip, habarda aýdylýar.
Bu barlaghanada ýetişdirilen eritrositleriň barlagyň çäklerinde adama goýberilmegi bilen bagly dünýäde ilkinji ýagdaýdyr.
Eger alnan öýjükleriň howpsuzdygy we netijelidigi subut edilse, olar soňlugy bilen gan kesellerini, mysal üçin, orak görnüşli-öýjük ganazlygyny bejermekde uly özgerişlik döredip, şeýle-de donor tapmak kyn bolýan seýrek topara degişli ganly adamlary halas edip biler.
Barlagyň dowamynda barlaghana şertlerinde ýetişdirilen öýjükleriň ömrüniň, şol bir donoryň standart eritrositlerini goýbermek bilen deňeşdirilende, dowamlylygy öwrenilýär.
"Häzirki wagtda iki adama barlaghanada ýetişdirilen eritrositleri goýberdiler. Olar dykgat bilen göz astyna alyndy we hiç hili ýaramaz netije bellige alynmady. Olar sagdyn" - diýip habarda aýdylýar.
Barlaghanada ýetişdirilip goýberilýän öýjükleriň sany üýtgäp durýar, ýöne 5-10 ml töwerek - çen bilen bir çaý çemçesinden iki çaý çemçesine çenli.
Soňraky eksperimentleriň dowamynda 10 gatnaşyja 4 aý arakesme bilen iki gezek eritrosit goýbererler - biri donoryňky, ikinjisi emeli ýetişdirilen. Alymlara ýetişdirilen öýjükler donoryňka garanda adam bedeninde uzak saklanýarmy ýa-da ýok, bilmek gerek.
