Prezident Serdar Berdimuhamedow 2023-nji ýylyň Döwlet býujetiniň taslamasyny Milli Geňeşiň Mejlisine iberdi. Milli Geňeşiň Mejlisine iberilýän hata Serdar Berdimuhamedow 4-nji noýabrda geçirilen Ministrler Kabinetiniň mejlisiniň dowamynda gol çekdi.
Bellenilişi ýaly, bu resminamada degişli Permana laýyklykda zähmet haklarynyň, pensiýalaryň, talyp haklarynyň, döwlet kömek pullarynyň we beýleki durmuş tölegleriniň möçberlerini mundan beýläk-de ýokarlandyrmak göz öňünde tutulandyr.
Mejlisiň barşynda wise-premýer H.Geldimyradow geljek ýyl üçin esasy maliýe meýilnamasynyň taslamasynyň esasy maddalary boýunça göz öňünde tutulan çykdajylar barada hasabat berip, serişdeleriň ep-esli böleginiň durmuş ulgamyny ösdürmäge gönükdiriljekdigini habar berdi. 2023-nji ýyl üçin bölünip berilýän maýa goýumlary hem milli ykdysadyýetiň kuwwatyny pugtalandyrmaga, pudaklar üçin täze önümçilikleri gurmaga hem-de hereket edýänlerini döwrebaplaşdyrmaga, ýaşaýyş jaýlaryny gurmaga gönükdiriler.
Serdar Berdimuhamedow hasabaty diňläp, işiň ileri tutulýan ugurlarynyň birnäçesine ünsi çekdi. Ýurdumyzyň ykdysadyýetiniň ýagdaýyna seljerme geçirmek, şeýle hem, emele gelen ýagdaýdan ugur alyp, ýurdumyzy durmuş-ykdysady taýdan ösdürmekde garaşylýan netijeleri seljermek ýerine ýetirilmeli işleriň esasylarynyň hatarynda görkezildi.
