Ýerlerde ýagdaýlaryň öwrenilmegi netijesinde welaýatlaryň we etraplaryň ýolbaşçylarynyň häzirlikçe öňde goýlan wezipeleri, ilatymyzyň durmuşyny gowulandyrmak boýunça meseleleri çözmekde talabalaýyk işlemeýändiklerini görkezdi diýip, Milli Geňeşiň Halk Maslahatynyň Başlygy Gurbanguly Berdimuhamedow ýurdumyzyň döwlet dolandyryş ulgamyny has-da kämilleşdirmek meselelerine bagyşlap 22-nji oktýabrda geçirilen mejlisde belledi.
Mejlisiň barşynda welaýat häkimleri çykyş etdiler.
Milli Geňeşiň Halk Maslahatynyň Başlygy welaýatlarda pagta ýygymynyň, bugdaý ekişiniň, ekerançylyk meýdanlarynyň suw üpjünçiliginiň derejesiniň pesdigini aýdyp, döwlet tarapyndan köp möçberde satyn alnan tehnikalaryň netijeli ulanylmaýandygyna, beýleki pudaklaryň hem oňat netijeleri görkezmeýändiklerine ünsi çekdi.
«Munuň özi welaýatyň we etraplaryň häkimleriniň bildirilýän talaplara laýyklykda iş alyp barmaýandygyny görkezýär» diýip belläp, Gurbanguly Berdimuhamedow häkimlikleriň dolandyryş düzümlerini döwrüň talabyna laýyk derejede kämilleşdirmek meseleleriniň zerurdygyny aýtdy.
