Şu gün, 3-nji oktýabrda Prezident Serdar Berdimuhamedow oba hojalyk toplumynda alnyp barylýan işleriň ýagdaýy we sebitlerde möwsümleýin oba hojalyk işleriniň alnyp barlyşy bilen baglanyşykly sanly ulgam arkaly iş maslahatyny geçirdi.
Iş maslahatyna obasenagat toplumy boýunça wise-premýer A.Ýazmyradow hem-de welaýatlaryň häkimleri gatnaşdy.
Maslahatyň barşynda welaýat häkimleri ýerlerde pagta ýygymynyň depginini güýçlendirmek ugrunda geçirilýän çäreler, şeýle hem bu möwsümde pagta arassalaýjy kärhanalaryň hem-de kabul ediş harmanhanalaryň, kombaýnlaryň hem-de beýleki tehnikalaryň bökdençsiz işledilişi barada hasabat berdi.
Şeýle hem güýzlük ýeralmanyň, gök-bakja we beýleki oba hojalyk ekinlerine ideg etmek hem-de ýetişdirilen bol hasyly öz wagtynda ýygnap almak boýunça netijeli işleriň alnyp barylýandygy habar berildi.
Serdar Berdimuhamedow hasabatlary diňläp, pagta ýygymynyň depgininiň güýçlendirilmelidigine hem-de bu ugurda öňde durýan wezipeleriň talabalaýyk ýerine ýetirilmegi üçin ähli tagallalaryň edilmelidigine ünsi çekdi.
Serdar Berdimuhamedow güýzlük ýeralmanyň, gök-bakja we beýleki ekinleriň bol hasylynyň ýurdumyzyň azyk howpsuzlygynyň kepili bolup durýandygyny belledi.
Maslahatyň barşynda şeýle hem wise-premýer A.Ýazmyradow ýurdumyzyň oba hojalygyny ösdürmek, ýer-suw serişdelerini rejeli peýdalanmak hem-de topragyň hasyllylygyny artdyrmak boýunça alnyp barylýan toplumlaýyn işler barada hasabat berdi.
