Merkezi Aziýa döwletleriniň Baştutanlarynyň sammitine gatnaşmak üçin Gyrgyzystana baran Türkmenistanyň Prezidenti Serdar Berdimuhamedow Çolpon-Ata şäherinde gyrgyz Lideri Sadyr Žaparow bilen duşuşdy diýip, gyrgyz Lideriniň metbugat-gullugy habar berýär.
Duşuşygyň barşynda Sadyr Žaparow Gyrgyzystan bilen Türkmenistanyň ýakyn dost hem strategik hyzmatdaşdygyny belledi we gyrgyz tarapynyň Aşgabat bilen söwda-ykdysady gatnaşyklarynyň gerimini giňeltmäge we ösdürmäge aýratyn ähmiýet berýändigini nygtady.
Serdar Berdimuhamedow mähirli garşy alnandygy üçin gyrgyz kärdeşine minnetdarlyk bildirdi hem-de Türkmenistanyň özara gyzyklanma bildirilýän ähli ugurlar boýunça Gyrgyzystan bilen netijeli hyzmatdaşlygyny dowam etmäge taýýarlygyny belledi.
Şeýle hem türkmen Lideri şu gün gol çekiljek resminamalaryň sebitiň döwletleriniň arasynda hyzmatdaşlygy giňeltmäge we çuňlaşdyrmaga ýardam etjekdigine ynam bildirdi.
