Hindistan we Merkezi Aziýa döwletleri Owganystan boýunça bilelikdäki topary döretmek barada ylalaşdylar. Bu barada Hindistanyň Daşary işler ministriniň orunbasary Rinat Sandhu onlaýn görnüşde geçirilen Hindistan – Merkezi Aziýa sammitiniň ahyrynda habar berdi diýip, TASS belleýär.
“Ýokary derejeli Hindistan – Merkezi Aziýa duşuşygynda liderler Owganystan boýunça ýakyn maslahatlaşmalary dowam etdirmek barada ylalaşdylar we Owganystan boýunça ýokary wezipeli resmi adamlaryň derejesinde bilelikdäki iş toparyny döretmek kararyna geldiler” – diýip, Sandhu aýtdy.
Hindistan we Merkezi Aziýa döwletleri Owganystanyň halkyna ynsanperwer kömegini bermegi dowam etdirmek isleýärler diýlip, Hindistan – Merkezi Aziýa onlaýn sammitiniň ahyrynda kabul edilen bilelikdäki Deli jarnamasynda bellenilýär.
Şeýle-de, duşuşyga gatnaşyjylar Owganystanyň çäginiň terroristik hereketlerini gizlemek, taýýarlamak, meýilleşdirmek ýa-da maliýeleşdirmek üçin ulanylmazlygyny gönümel talap edýän we ähli terroristik toparlara garşy ylalaşykly hereketlere çagyrýan BMG-niň Howpsuzlyk Geňeşiniň 2593 belgili rezolýusiýasynyň möhümligini tassykladylar diýlip, resminamada görkezilýär.
