Türkmenistanyň ähli welaýatlarynda Içeri işler ministrliginiň Polisiýanyň ýol gözegçiligi müdirliginiň ýanynda Awtoulaglaryň tehniki ýagdaýynyň anyklaýyş we hasaba alyş toparynyň edara binalary ulanmaga berildi.
Şeýle edaralar şu aşakdaky sebitlerde hereket edip başlady:
- Gökdepe, Bäherden we Tejen etraplarynda — Ahal welaýaty;
- Köneürgenç — Daşoguz welaýaty;
- Türkmenbaşy şäheri — Balkan welaýaty;
- Kerki etraby — Lebap welaýaty;
- Baýramaly etraby — Mary welaýaty;
Desgalar döwrebap sanly enjamlar bilen enjamlaşdyrylyp, ulag serişdeleriniň ulanyşa ýaramlylygyny tiz hem takyk kesgitlemäge mümkinçilik berýär.
Desgalaryň gurluşyk işleri Türkmenistanyň Içeri işler ministrliginiň Gurluşyk birleşigi tarapyndan ýerine ýetirildi. Desgalarda oturdylan enjamlar awtoulaglaryň ekologik kadalaryň talaplaryna laýyklygynyň, dolandyryş ulgamynyň tehniki ýagdaýynyň, tizlik ölçeýjisiniň işleýşiniň, hereketlendirijisiniň bölüp çykarýan gazynyň mukdarynyň, yşyklandyryş we durzujy ulgamlarynyň talabalaýyklygynyň barlaglaryny ýokary hilli geçirmäge mümkinçilik berýär. Munuň özi anyklaýyş işleriniň ýokary hil derejesini üpjün etmek bilen bir hatarda, etraplaryň ilaty üçin bu işleri uzak aralyga gitmezden, gysga wagtda ýerine ýetirmäge mümkinçilik döredýär.
