Prezident Gurbanguly Berdimuhamedowyň tabşyrygy boýunça 8-9-njy ýanwarda Türkmenistanyň we Eýran Yslam Respublikasynyň arasyndaky gatnaşyklaryň möhüm ugurlary boýunça iş duşuşyklaryny geçirmek maksady bilen, Türkmenistanyň Hökümet wekiliýeti Tähran şäherinde gulluk iş saparynda bolýar. Ministrler Kabinetiniň Başlygynyň orunbasary Serdar Berdimuhamedowyň we wise-premýer, daşary işler ministri Raşid Meredowyň ýolbaşçylygyndaky wekiliýetiň Eýranyň Hökümeti bilen geçiren duşuşyklary barada TDIM-niň Metbugat gullugy habar berýär.
Bellenilişi ýaly, Eýranyň nebit ministri Jawad Owji bilen gepleşikleriň dowamynda taraplar söwda-ykdysady hyzmatdaşlygy giňeltmek meselelerini ara alyp malsahatlaşdylar, şeýle hem iki ýurduň arasyndaky gatnaşyklary ösdürmegiň ileri tutulýan ugurlary boýunça döwletara ylalaşyklaryň ýerine ýetirilişi barada pikir alyşdylar.
Eýranyň ýol we şähergurluşyk ministri Rostam Gasemi bilen geçirilen gepleşiklerde iki ýurduň ägirt uly mümkinçiliklerini göz öňünde tutup, ýangyç-energetika pudagynda, senagat ulgamynda, ulag-aragatnaşyk pudagynda hyzmatdaşlygyň ösdürilmegine, hususan-da, halkara we sebitleýin awtomobil we demir ýol gatnawlarynyň ugurlarynyň giňeldilmegine aýratyn üns berildi. Şunda Eýranyň Türkmenistan üçin esasy söwda-ykdysady hyzmatdaşlaryň biri bolup durýandygy nygtaldy. Saparyň birinji gününde Türkmenistanyň Hökümet wekiliýetiniň agzalarynyň EYR-nyň birinji Wise-prezidenti Mohammad Mohber bilen hem duşuşygy geçirildi.
