30-njy noýabrda Duşenbe şäherinde daşary işler ministrleri derejesinde «Merkezi Aziýa – Koreýa Respublikasy» hyzmatdaşlyk forumynyň 14-nji mejlisi geçirildi. Oňa foruma gatnaşyjy ýurtlaryň daşary syýasat edaralarynyň ýolbaşçylary gatnaşdylar. Türkmenistanyň wekiliýetine daşary işler ministri Raşid Meredow ýolbaşçylyk etdi.
Özara hereketleriň dört sany ýörite ugry: tokaý hojalygy, «ýaşyl» energetika, saglygy goraýyş we sanly tehnologiýalar pudaklaryndaky hyzmatdaşlyk nobatdaky forumyň gün tertibine girizildi.
Forumyň barşynda wekiliýetleriň ýolbaşçylary pandemiýanyň netijelerini, şeýle-de sebit we ählumumy prosesleri nazara almak bilen, Merkezi Aziýa ýurtlarynyň we Koreýa Respublikasynyň arasyndaky önjeýli gatnaşyklaryň derwaýys meselelerini hem ara alyp maslahatlaşdylar.
Forumyň barşynda eden çykyşynda Türkmenistanyň daşary işler ministri R.Meredow, Merkezi Aziýa ýurtlarynyň we Koreýa Respublikasynyň arasyndaky hyzmatdaşlygyň yzygiderliligini we maksadaokgunlylygyny nygtamak bilen, nobatdaky duşuşygyň gün tertibinde bellenen meseleleriň ählisi boýunça Türkmenistanyň alyp barýan işini hem şöhlelendirdi. Ýurduň «ýaşyl» ykdysadyýetiň ösüşine, şol sanda energetika we senagat ýaly pudaklaryň tebigaty goraýjy ulgamlarynyň giňeldilmegine goşýan ähmiýetli goşandy hem aýratyn bellenildi.
Şeýle-de 14-nji hyzmatdaşlyk forumynyň çäklerinde, 29-njy noýabrda Duşenbede foruma gatnaşyjy ýurtlaryň Söwda-senagat edaralarynyň ýolbaşçylarynyň we işewürler toparlarynyň wirtual görnüşde gatnaşmaklarynda Merkezi Aziýanyň we Koreýa Respublikasynyň birinji Işewürlik maslahaty hem geçirildi.
