Türkmenistanyň Garaşsyzlygynyň şanly 30 ýyllygy mynasybetli ýurdumyzda we daşary ýurtlarda dürli halkara çäreler yzygiderli geçirildi. Türkmenistanyň daşary ýurtlardaky ilçihanalary we konsullyk edaralary tarapyndan maslahatlar, forumlar, sergilerdir konsertler we başga-da ençeme çäreler guraldy. Olar barada TDIM-niň Metbugat gullugy habar berýär.
- 23-nji sentýabrda Hyrat şäherindäki Türkmenistanyň Baş konsullygy tarapyndan bu şanly senä bagyşlanyp maslahat geçirildi. Oňa Hyrat we Badhyz welaýatlarynda ýaşaýan türkmen kowçumlarynyň wekilleri gatnaşdylar. Çärä gatnaşyjylar Türkmenistanyň Prezidentini we türkmen halkyny ýurdumyzyň 30 ýyllygy bilen tüýs ýürekden gutladylar hem-de Türkmenistanyň owgan halkyna berýän dost-doganlyk goldawy we ynsanperwerlik kömegi üçin minnetdarlyk sözlerini beýan etdiler.
- Türkmenistanyň Türkiýe Respublikasyndaky ilçihanasy tarapyndan ýurdumyzyň Garaşsyzlygynyň 30 ýyllygyna we 2021-nji ýylyň “Türkmenistan – parahatçylygyň we ynanyşmagyň Watany” diýlip yglan edilmegine bagyşlanyp Türkiýäniň Kyrşehir Ahy Ewran uniwersitetinde, ýolbaşçylarynyň, professor-mugallymlarynyň, talyplarynyň, şol sanda türkmenistanly talyplarynyň gatnaşmaklarynda medeni çäre geçirildi. Çäräniň çäklerinde uniwersitetde okaýan talyplaryň konserti hem-de ýurdumyzyň medeni gymmatlyklarynyň we Türkmenistanyň Prezidentiniň kitaplarynyň sergisi guraldy.
- ABŞ-nyň Sietl şäherinde “Türkmenistanyň Garaşsyzlygynyň 30 ýyllygy we onuň daşary syýasatyndaky halkara başlangyçlar” temasy boýunça maslahat geçirildi. Bu çäre Türkmenistanyň ABŞ-daky ilçihanasy tarapyndan guralyp, oňa Türkmenistanyň raýatlary we talyp ýaşlary gatnaşdylar. Duşuşygyň dowamynda Türkmenistanyň Bitaraplyk derejesine esaslanýan hoşniýetli daşary syýasaty barada barada gürrüň berildi.
- Türkmenistanyň Beýik Britaniýanyň we Demirgazyk Irlandiýanyň Birleşen Patyşalygyndaky ilçihanasy hem baýramçylyk çäresini geçirdi. Oňa London şäheriniň abraýly ýokary okuw mekdepleriniň professor-mugallymlary we talyplary hem-de türkmen kowçumlarynyň wekilleri gatnaşdylar. Çäräniň barşynda Türkmenistanyň ilçisi çykyş edip, syýasy, ykdysady, durmuş we medeni ugurlary boýunça Türkmenistanda amala aşyrylan uly özgertmeler barada aýdyp geçdi.
- Türkmenistanyň Saud Arabystany Patyşalygyndaky Ilçihanasy tarapyndan şanly sene – türkmen döwletiniň Garaşsyzlygynyň 30 ýyllygy mynasybetli çäre geçirildi. Onuň dowamynda Garaşsyzlyk ýyllarynda gazanylan üstünlikler hem-de içeri we daşary syýasatyň ösüşi babatynda aýratyn bellenildi.
