Ýewropanyň uçar öndüriji ägirdi Airbus Tuluzada (Fransiýa) we Gamburgda (Germaniýa) täze paýlaşykly superkompýuter infrastrukturasyny ulanmaga berdi. Bu ulgam uçarlaryň we dikuçarlaryň wirtual taslamalaryny taýýarlamagy görnetin çaltlandyrar.
Maglumat tehnologiýalary kuwwatyny döwrebaplaşdyrmak işi «Bull» prowaýderi bilen baglaşylan 100 million ýewrolyk 5 ýyllyk şertnamanyň çäginde amala aşyryldy. Munuň özi konserne hasaplama ukybyny birbada üç esse artdyrmaga mümkinçilik berdi.
Ulgamyň apparat bölegi AMD we Nvidia kompaniýalarynyň prosessorlaryny hem-de grafiki güýçlendirijilerini, şeýle hem IBM Spectrum Scale maglumat saklaýyş ulgamyny birleşdirýän «BullSequana XH3000» modullaryna esaslanýar. Nvidia InfiniBand NDR tor birikmesi bolsa her port üçin sagatda 400 Gbit/s çenli maglumat geçirijilik ukybyny üpjün edýär.
Fransiýadaky meýdança deslapdan ýygnalan enjamlary 2025-nji ýylda aldy, Germaniýadaky desga bolsa şu baharda doly enjamlaşdyryldy.
Fiziki taýdan iki aýratyn ýerde ýerleşýän bu ulgamlar ýörite bitewi meýilnamalaşdyryjy arkaly umumy wirtual klaster hökmünde bilelikde işleýärler.
Airbus bu ägirt uly hasaplama güýjüni howa gämileriniň sanly ekizlerini döretmek, aerodinamiki hasaplamalary geçirmek, gurluşyň agram göterijilik durnuklylygyny seljermek we akustiki synaglaryny amala aşyrmak üçin ulanar.
Taslamanyň ýene bir aýratyn tarapy, onuň energiýa tygşytlylygydyr. Superkompýuteriň göni suwuklyk arkaly sowadyş ulgamy, enjamlardan çykýan artykmaç ýylylygy kompaniýanyň edara binalaryny gyzdyrmak üçin ulanmaga mümkinçilik berýär.
