Paleontologlar dinozawryň täze görnüşini anyklady. Xiangyunloong fengming diýlip atlandyrylan bu dinozawr, takmynan, 190 million ýyl ozal häzirki Hytaýyň çäklerinde ýaşapdyr. Tapylan galyndy uzyn boýunly ösümlik iýýän dinozawrlaryň irki ewolýusiýasyny has gowy öwrenmekde bar bolan boşlugy doldurmaga mümkinçilik berýär.
Galyndylar Ýunnan welaýatynyň Fenszýahe geologik gatlagyndan tapyldy. Alymlar boýun oňurgalarynyň, çanaklygyň we but süňkleriniň böleklerine esaslanyp, bu görnüşe häsiýetnama berdi. Haýwanyň uzynlygy 9–10 metre ýetipdir, bu bolsa ony sebitde tapylan irki ýura döwrüniň ösümlik bilen iýmitlenýän iň uly dinozawrlarynyň birine öwürýär.
Görnüşiň ady Sýanýun uýezdine we hytaý dilindäki «loong» («aždarha») sözüne esaslanýar, «fengming» («feniksiň saýramagy») diýen goşmaça ady bolsa medeni baglanyşygy hem-de guşlaryň dinozawrlaryň göni neslidigini ýatladýar.
Gurluşy boýunça Xiangyunloong fengming öz «kowumlaryndan» ep-esli tapawutlanýar — onuň has uly göwresi, deňeşdirende gysga boýny we uzyn guýrugy bar. Bu aýratynlyklar gigantizmiň irki tapgyryndan habar berýär we haýwanyň iki aýakda ýörän bolmagynyň mümkindigini görkezýär. Bu ýagdaý şol toparyň soňky wekilleri üçin seýrek duş gelýän häsiýetdir.
Alymlaryň pikiriçe, tapylan görnüş boýnuň kem-kemden uzalmak hadysasy bolmadyk başgaça ewolýusion ýoluň subutnamasy bolup çykyş edýär. Bu bolsa sawropodlaryň ata-babalarynyň arasynda görnüşleriň dürlüliginiň öň çaklanylandan has giň bolandygyny tassyklaýar.
