Ýewropa Bileleşiginiň (ÝB) Türkmenistandaky wekilhanasy Instagram sosial ulgamynda täze döredijilik bäsleşigini yglan etdi.
Bu çäre 4-nji Ýewropa kinofestiwalynyň çäklerinde görkeziljek «Flow» (Поток) animasion filmine bagyşlanyp, öý haýwanlary, aýratyn-da, pişikler baradaky gyzykly gürrüňleri paýlaşmak isleýänlere gönükdirilendir.
Bäsleşigiň esasy maksady haýwanlara bolan mähirli gatnaşygy wagyz etmekden we ýaşlaryň döredijilik işjeňligini ösdürmekden ybarat.
Bäsleşige gatnaşmak üçin ulanyjylar öz pişigi barada gürrüň berýän posty ýa-da wideoşekili (Reels) taýýarlap, öz akkauntynda paýlaşmaly. Şunda @eu4turkmenistan akkauntyny bellemek we bäsleşigiň dowamynda profiliň açyk bolmagyny üpjün etmek hökmany şertdir.
Ýeňijiler 14-nji maýda sagat 18:00-da laýklaryň sany boýunça kesgitlener. Iň halanan on publikasiýanyň awtorlary Ýewropa Bileleşiginiň Türkmenistandaky wekilhanasynyň ýörite baýraklary bilen sylaglanar.
