30-njy aprelde Aşgabatda Türkmenistanyň daşary işler ministri Raşid Meredowyň we Türki medeniýetiniň halkara guramasynyň (TÜRKSOÝ) Baş sekretary Sultan Raýewiň arasynda gepleşikler geçirildi. Bu barada daşary syýasat edarasynyň metbugat gullugy habar berýär.
Duşuşygyň esasy maksady Türkmenistanyň bu abraýly gurama bilen özara gatnaşyklarynyň möhüm meselelerini we 2026-njy ýyl üçin meýilleşdirilen bilelikdäki çäreleri maslahatlaşmakdan ybarat boldy.
Gepleşikleriň dowamynda Raşid Meredow Baş sekretaryň TÜRKSOÝ-yň opera günlerine hem-de görnükli türkmen kompozitory Weli Muhadowyň doglan gününiň 110 ýyllygyna bagyşlanan dabaralara gatnaşmak üçin Aşgabada saparynyň ähmiýetini nygtady. Şeýle hem türkmen medeniýet işgärleriniň türki dünýäsiniň sungatyna goşan goşantlarynyň TÜRKSOÝ-yň ýörite baýraklary bilen bellenilmegine üns çekildi.
Taraplar medeni-ynsanperwer gepleşikleriň diňe bir türki dilli halklaryň arasynda däl, eýsem sebitde we dünýäde parahatçylygy hem-de özara düşünişmegi berkitmekde möhüm gural bolup hyzmat edýändigini tassyklady.
Duşuşykda guramanyň işini has-da kämilleşdirmek barada pikir alşyldy. Sultan Raýew şu ýyl Türkmenistanyň Garaşsyzlygynyň 35 ýyllygy mynasybetli geçiriljek dabaralara gatnaşmaga çakylyk alandygy üçin hoşallyk bildirdi.
Gepleşikleriň ahyrynda Türkmenistanyň TÜRKSOÝ bilen hyzmatdaşlygy mundan beýläk-de işjeň dowam etdirmäge taýýardygy tassyklanyldy.
