Seýdiniň nebiti gaýtadan işleýän zawodynyň işini kämilleşdirmek we önümçilik desgalaryny döwrebaplaşdyrmak boýunça işler durmuşa geçirilýär. Ministrler Kabinetiniň Başlygynyň orunbasary G.Agajanow Hökümet mejlisiniň dowamynda «Türkmennebit» döwlet konserni tarapyndan bu ugurda alnyp barylýan işler barada hasabat berdi. Bu barada «Watan» habarlar gepleşiginde habar berildi.
Hasabatda bellenilişi ýaly, häzirki wagtda zawodyň kuwwatlyklaryny ýokarlandyrmak, nebiti çuňňur gaýtadan işlemek we önümçilik desgalaryny döwrebaplaşdyrmak boýunça degişli çäreler amala aşyrylýar. Bu işleriň ýokary hilli ýerine ýetirilmegi kärhanany döwrebap enjamlar bilen üpjün etmäge hem-de önümçilik kuwwatyny has-da artdyrmaga mümkinçilik berer.
Şunuň bilen baglylykda, wise-premýer döwlet Baştutanynyň garamagyna önümçiligi kämilleşdirmäge gönükdirilen degişli teklibi hödürledi.
Türkmenistanyň Prezidenti hasabaty diňläp, ýurtda nebitgaz senagatyny döwrebap derejede ösdürmek boýunça maksatnamalaýyn işleriň durmuşa geçirilýändigini belledi. Döwlet Baştutany Seýdiniň nebiti gaýtadan işleýän zawodynyň desgalaryny döwrebaplaşdyrmak baradaky teklibi goldap, wise-premýere bu ugurda degişli işleri geçirmegi tabşyrdy.
