2026-njy ýylyň 22-nji aprelinde Astana şäheriniň Kongresler merkezinde «Durnukly geljek boýunça umumy garaýyş» atly Sebitleýin ekologiýa sammitiniň (RES 2026) plenar mejlisi geçirildi. Sammitiň gün tertibine sebitde azyk howpsuzlygy, tebigy serişdeleri durnukly dolandyrmak, howanyň hapalanmagyna garşy göreş we sanly tejribeler ýaly möhüm meseleler girizildi. Bu barada «Watan» habarlar gepleşiginde habar berildi.
Türkmenistanyň Prezidenti Serdar Berdimuhamedow sammitde eden çykyşynyň dowamynda suw serişdeleriniň azalmagy, çölleşme hadysalarynyň güýçlenmegi we biologik köpdürlüligiň ýitmegi ýaly hadysalaryň durmuşyň dürli ugurlaryna ýaramaz täsir edýändigini nygtady. Döwlet Baştutany Türkmenistanyň bu sammitde Howa tehnologiýalary boýunça sebit merkezini hem-de Çölleşmä garşy göreşmek boýunça sebit merkezini döretmek başlangyçlaryny öňe sürýändigini aýtdy.
Türkmenistanyň Prezidenti howanyň üýtgemeginiň ýaramaz täsirlerini peseltmek we oňa uýgunlaşmak boýunça amaly çäreleriň görülmelidigini aýratyn belläp, ykdysadyýetiň ähli pudaklarynda «ýaşyl» ösüş ýörelgelerini ilerletmegiň, ekologiýa taýdan durnukly ösüş meseleleri boýunça sebit dialogyny işjeňleşdirmegiň zerurdygyny nygtady.
Şeýle hem, Türkmenistan suw meseleleriniň halkara kadalar esasynda we ähli taraplaryň bähbitlerini hasaba almak bilen çözülmeginiň tarapdary hökmünde çykyş edýär. Şunuň bilen baglylykda, BMG-niň howandarlygynda Merkezi Aziýa ýurtlarynda suwdan peýdalanmak meseleleri boýunça Sebit geňeşini döretmek teklibi öňe sürüldi.
Serdar Berdimuhamedow öz çykyşynda Hazar deňziniň we Aralyň ekologiýa meselelerine hem aýratyn ünsi çekdi. Türkmenistanyň Hazar ekologiýa başlangyjynyň Konsepsiýasyny taýýarlandygy we şu ýylyň oktýabr aýynda bu ugurda ýokary derejeli täze duşuşygyň geçiriljekdigi bellenildi.
Sammitiň netijeleri boýunça Merkezi Aziýa döwletleriniň Baştutanlarynyň «Merkezi Aziýada ekologiýa raýdaşlygy» atly Jarnamasy kabul edildi. Bu resminama sebit ýurtlarynyň durnukly ösüş we daşky gurşawy goramak ugrundaky hyzmatdaşlygynyň täze tapgyryny alamatlandyrýar.
