15-nji aprelde Aşgabatda Türkmenistanyň Daşary işler ministriniň orunbasary Mähri Bäşimowa bilen «BMG – Syýahatçylyk» guramasynyň Ýewropa boýunça sebit direktorynyň wezipesini wagtlaýyn ýerine ýetiriji Kordula Wolmuteriň arasynda duşuşyk geçirildi. Bu barada Türkmenistanyň DIM-i habar berýär.
Duşuşygyň başynda türkmen tarapy guramanyň wekiliýetine «TurkmenTravel – 2026» halkara sergisine we maslahatyna gatnaşandygy üçin minnetdarlyk bildirdi.
Taraplar häzirki hyzmatdaşlygy we mundan ozal gazanylan ylalaşyklaryň ýerine ýetirilişini ara alyp maslahatlaşdy. Gepleşikleriň dowamynda ýurduň syýahatçylyk mümkinçiliklerini ilerletmek, infrastrukturany ösdürmek we hünärmenleri taýýarlamak meseleleri barada söz açyldy.
Türkmenistan bilen BMG-niň arasynda 2026–2030-njy ýyllar üçin hyzmatdaşlygyň Çarçuwaly maksatnamasynyň çäklerindäki gatnaşyklara aýratyn üns berildi. Şeýle hem türkmen tarapy 2027-nji ýylyň «Durnukly we daşky şertlere uýgunlaşan syýahatçylygyň halkara ýyly» diýlip yglan edilmegini hem-de kabul edilen «ýol kartasynyň» işe girizilmegini goldady.
Hyzmatdaşlygyň geljegi uly bolan ugurlarynyň hatarynda sanly çözgütler, innowasiýalary ornaşdyrmak, maýa goýumlary çekmek, täze iş orunlaryny döretmek, pudagyň durnuklylygyny ýokarlandyrmak, medeni we tebigy mirasy gorap saklamak görkezildi.
Munuň bilen birlikde, amaly meseleler, şol sanda talyplar we hünärmenler üçin «BMG – Syýahatçylyk» guramasynyň ýöriteleşdirilen okuw maslahatyny geçirmek baradaky meseleler maslahatlaşyldy.
Türkmen tarapy guramanyň düzümlerine has işjeň gatnaşmaga taýýardygyny tassyklady we Ýewropa sebitleýin komissiýasynyň 72-nji sessiýasyna gatnaşmak mümkinçiligine garady.
