2026-njy ýylyň 5-nji aprelinde Kabul şäherinde «Merkezi Aziýa – Owganystan» konsultatiw dialogynyň ilkinji mejlisi boldy. Bu barada Türkmenistanyň Daşary işler ministrligi habar berýär.
Duşuşykda türkmen wekiliýetine Türkmenistanyň Owganystandaky Ilçisi Hoja Öwezow ýolbaşçylyk etdi. Gepleşikleriň dowamynda taraplar Merkezi Aziýa döwletleri bilen Owganystanyň arasyndaky ykdysady we üstaşyr hyzmatdaşlygy giňeltmegiň mümkinçiliklerine, sebitara integrasiýanyň ýol kartasyny işläp taýýarlamak meselelerine we bar bolan wehimlere bilelikde baha bermek meselesine seretdi.
Türkmenistanyň wekili öz çykyşynda ýurduň Owganystanyň ykdysadyýetini dikeltmäge ýardam bermäge gönükdirilen taslamalary barada giňişleýin maglumat berdi.
Duşuşyga gatnaşyjylar täze formatdaky konsultatiw dialogyň yzygiderli dowam etdirilmegini goldady. Şeýle hem Owganystanyň halkara gatnaşyklar ulgamyna goşulyşmagy bilen bagly bilelikdäki taslamalary durmuşa geçirmek boýunça hyzmatdaşlyga gyzyklanma bildirildi.
