«Hyzmatdaşlyk we ösüş» atly köpugurly halkara sergisine gatnaşmaga eýýäm 80-den gowrak daşary ýurt we türkmen kompaniýalary isleg bildirdi, hasaba alyş işleri bolsa dowam edýär. Bu barada wise-premýer N.Atagulyýew 27-nji martda sanly ulgam arkaly geçirilen Ministrler Kabinetiniň mejlisinde habar berdi.
«Watan» habarlar gepleşiginde berlen maglumata görä, döwlet Baştutanynyň garamagyna sergini guramak bilen bagly degişli teklip hödürlendi.
Prezident Serdar Berdimuhamedow hasabaty diňläp, ýurtda halkara forumlaryň we sergileriň yzygiderli geçirilýändigini, munuň bolsa daşary ýurtly hyzmatdaşlar bilen söwda-ykdysady gatnaşyklary ösdürmäge ýardam edýändigini belledi. Döwlet Baştutany çäräniň ýokary derejede taýýarlanylmagyny we geçirilmegini üpjün etmegi tabşyrdy.
«Hyzmatdaşlyk we ösüş» atly sergi 2026-njy ýylyň 2—4-nji apreli aralygynda Aşgabatda, Türkmenistanyň Söwda-senagat edarasynyň binasynda geçiriler.
Sergide enjamlar, tehniki çözgütler, metal önümleri, gurluşyk materiallary, himiýa önümleri we beýleki harytlar tanyşdyrylar. Esasy ugurlaryň arasynda çig mal we materiallar, yşyklandyryş we awtomatlaşdyryş ulgamlary, «akylly» tehnologiýalar we gözegçilik ulgamlary, elektrotehniki we kabel çözgütleri, howpsuzlyk ulgamlary, ýyladyş, ýelejiretme we sowadyş çözgütleri, gurallar, şeýle hem gapylar, penjireler, interýer elementleri, izolýasiýa, keramika, landşaft we modul gurluşlary bar.
