26-njy martda Aşgabadyň «Ýyldyz» myhmanhanasynda Türkmenistanyň we Ýewropa Bileleşiginiň hyzmatdaşlygyna bagyşlanan «Özara baglanyşygy ösdürmek, maýa goýumlary çekmek we durnukly ösüşi üpjün etmek boýunça täze gözýetimler» atly işewürlik maslahaty geçirildi.
Çärä ministrlikleriň we pudaklaýyn dolandyryş edaralarynyň ýolbaşçylary, diplomatik wekilhanalaryň, halkara guramalaryň we işewür toparlaryň wekilleri gatnaşdy.
Forumyň birinji mejlisinde söwdany we maýa goýumlary ösdürmek, telekeçiligiň hukuk binýadyny pugtalandyrmak hem-de hususy pudagyň eksport mümkinçiliklerini giňeltmek meseleleri maslahatlaşyldy. Türkmenistanyň Bütindünýä Söwda Guramasyna agza bolmagy bilen bagly meselä aýratyn üns berildi.
Ikinji mejlis ulag-logistika gatnaşyklaryna bagyşlandy. Sanlylaşdyrmak, gümrük amallaryny awtomatlaşdyrmak we halkara ulag geçelgelerini ösdürmek meselelerine garaldy.
Üçünji mejlis «ýaşyl» ykdysadyýete geçmek, gaýtadan dikeldilýän energiýa çeşmelerini ulanmak we metan zyňyndylaryny azaltmak baradaky meseleleri öz içine aldy.
Forumyň çäklerinde hyzmatdaşlygyň şertnama-hukuk binýadyny giňeltmäge we maýa goýum taslamalaryny durmuşa geçirmäge gönükdirilen ikitaraplaýyn resminamalara gol çekildi. Bu ylalaşyklar türkmen-ýewropa hyzmatdaşlygyny täze many-mazmun bilen baýlaşdyryp, onuň ösmegine güýçli itergi berer.
Şeýle hem çäräniň jemlerini jemleýän metbugat maslahaty geçirildi.
Mundan başga-da, Türkmenistanyň döwlet edaralarynyň we hususy pudagynyň wekilleri ýewropaly hyzmatdaşlar bilen geljegi uly bolan bilelikdäki taslamalary maslahatlaşmak üçin birnäçe duşuşyklary geçirdi.
