18-nji martda Pekinde Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň Hytaý Halk Respublikasynyň daşary işler ministri Wan I bilen duşuşygy boldy. Gepleşikler Türkmenistanyň Halk Maslahatynyň Başlygy Gurbanguly Berdimuhamedowyň Hytaýa amala aşyrýan saparynyň çäginde geçirildi.
Taraplar Türkmenistan bilen Hytaýyň arasyndaky hyzmatdaşlygyň ösmegini dowam etdirýändigini we ýokary derejedäki özara gatnaşyklar arkaly täze mazmun bilen baýlaşýandygyny belledi.
Wan I Gurbanguly Berdimuhamedowyň hytaý halkynyň öňden gelýän we wepaly dostudygyny nygtady. Diplomat iki ýurduň ýolbaşçylary tarapyndan binýady tutulan gatnaşyklaryň geljekki hyzmatdaşlyk üçin esas bolup galýandygyny aýtdy.
Raşid Meredow hytaý tarapyny «iki sessiýanyň» geçirilmegi bilen gutlady we Türkmenistanyň Hytaýyň dünýäde howpsuzlyga hem-de durnukly ösüşe gönükdirilen dört sany ählumumy başlangyjyny goldamaga ygrarlydygyny tassyklady.
Taraplar dialogy ösdürmek üçin meýdança hökmünde garalýan üçünji «Merkezi Aziýa — Hytaý» sammitine görülýän taýýarlyk işlerine aýratyn üns berdi.
«Türkmenistan we Hytaý köpasyrlyk dostluk däplerine hem-de deňhukuklylyk ýörelgelerine daýanyp, döwletara gatnaşyklaryny ählumumy parahatçylygyň we rowaçlygyň bähbidine ösüş ýoly bilen yzygiderli ilerletmegi dowam ederler» diýip, duşuşyga gatnaşyjylar nygtady.
