Gazagystanyň Petropawlowsk şäherinden bedenterbiýe mugallymy Anatoliý Wiselskiý diňe iki barmagynda 2 minut 7,45 sekunt asylyp durmak arkaly dünýä rekordyny täzeledi. Tengri Sport neşiriniň habar bermegine görä, bu ajaýyp netije resmi taýdan Ginnesiň rekordlar kitabyna girizildi.
Wiselskiý bu görkeziji bilen öňki rekordyň eýesi, italiýaly Marçello Ferriden 6 sekunt öňe geçmegi başardy (Ferriniň netijesi 2 minut 1 sekuntdy).
Rekordyň goýlanyna eýýäm alty aý çemesi wagt geçse-de, mugallym resmi sertifikatyny ýakynda aldy. Wiselskiý onuň sebäbini: «Eger sertifikaty 10 günüň içinde aljak bolsaň 500 ýewro, ýörite komissiýanyň gelmegini isleseň 11 müň ýewro tölemeli. Şonuň üçin garaşmaly boldy» diýip düşündirýär.
Anatoliý Wiselskiý ýaşaýan şäherindäki mekdepleriň birinde bedenterbiýe mugallymy bolup işleýär we çagalygyndan futbol, basketbol we woleýbol oýnamak bilen meşgullanýar, şeýle hem sport zallarynda yzygiderli türgenleşýär.
Ol internetde barmakda asylyp durmak we özüňi çekmek boýunça rekordlary görüp, muny özüniň hem başarjakdygyna göz ýetiripdir. Onuň indiki maksady iki we dört barmakda özüňi çekmek, şeýle hem bir-iki sagatlap adaty usulda özüňi çekip, täze rekordlary goýmakdyr.
Mugallymyň aýtmagyna görä, bu dünýä rekordy oňa maddy taýdan girdeji getirmeýär. Ol häzir hem adaty mugallymyň aýlygyna ýaşaýar. Emma Anatoliý gazanan bu meşhurlygynyň geljekde şowlulygyň täze gapylaryny açjakdygyna ynanýar.
