5-nji martda Brýusselde Türkmenistanyň Mejlisi bilen Ýewropa Parlamentiniň arasynda 9-njy parlamentara duşuşygy geçirildi. Bu barada Türkmenistanyň Mejlisiniň metbugat gullugy habar berdi.
Gepleşikleriň dowamynda türkmen tarapy parahatsöýüjilikli «Açyk gapylar» daşary syýasatynyň ileri tutulýan ugurlaryny hödürledi we kärdeşlerini milli parlamentiň häzirki wagtda alyp barýan kanunçykaryjylyk işi bilen tanyşdyrdy.
Gatnaşyjylar Türkmenistanyň Mejlisiniň ÝHHG-niň we Parlamentara birleşiginiň meýdançalarynda işjeň hyzmatdaşdygyny belledi. Ýewropa Bileleşigine agza döwletleriň Parlamentleriniň 15-isi bilen ikitaraplaýyn parlamentara dostluk toparlarynyň hereket edýändigine aýratyn üns berildi. Taraplar Türkmenistanyň Ýewropa bilen Aziýanyň çatrygyndaky amatly ýerleşişiniň uzak möhletleýin söwda-ykdysady we medeni hyzmatdaşlyk üçin giň mümkinçilikleri açýandygyny nygtady.
«Türkmenistan — ÝB» bilelikdäki komitetiň 24-nji mejlisiniň netijeleri bilen baglylykda, ulag, sanlylaşdyrmak, energetika we ekologiýa ulgamlaryndaky taslamalar ara alnyp maslahatlaşyldy. Ýewropa tarapy Türkmenistanyň bilim ulgamyny döwrebaplaşdyrmak we sanly maksatnamalary durmuşa geçirmek boýunça edýän tagallalaryna ýokary baha berdi.
Duşuşyk taraplaryň howpsuzlygy berkitmäge we giň gerimli düzümleýin başlangyçlary durmuşa geçirmäge bolan meýillerini tassyklady.
